نشوى مصطفى تروى موقفا إنسانيا عن هشام سليم
حكت الفنانة نشوى مصطفى، عن أحد المواقف الإنسانية للفنان الراحل هشام سليم، والذى رحل عن عالمنا، الخميس الماضي، عن عمر ناهز الـ64 عاما متأثرا بمرض السرطان.
ونشرت نشوى مصطفى، صورة للفنان الراحل عبر حسابها الشخصى بموقع "فيسبوك"، وعلقت عليها قائلة: "افتكرت حاجة عن هشام سليم يمكن مش كتير يعرفوها، فى يوم راجعة من التصوير وكان فيها أستاذة ممثلة كبيرة الله يرحمها اسمها ثريا إبراهيم، قالت لى نشوى معنديش عربية توصلينى فى طريقك لأقرب مكان أنزل أخد تاكسى، قلت لها تاكسى إزاى حاوصل حضرتك لباب البيت".
وتابعت: "وأحنا ماشيين قالت لى عارفة الشقة اللى حتوصلينى ليها دى مين جابهالى، قلت لها مين؟ قالت لى شريهان، وحكت لى أنها كانت بتشتغل معاها مسرحية شارع محمد على وكانت بتيجى كل يوم من طنطا للقاهرة وترجع تانى لأن بيتها كان هناك ولما شريهان عرفت قالت لها شوفى الشقة اللى تحبيها وأنا حاشتريهالك، ولما اشترتها كانت فرحانة أوى".
وأضافت: "لما هشام سليم عرف بارك لها وقال لها فرشتيها ولالسه، قالت له فرشتها قال لها كان نفسى افرشهالك، قالت له وهى بتهزر طيب ماتعمل حاجة تانية، قال لها تحت أمرك، قالت له نفسى أحج، تانى يوم لقت شركة سياحة بتكلمها وبلغتها أن هشام دفع كامل التكلفة وكانت 50 ألف جنيه، وكمان وهى رايحة عطاها مصروف الرحلة وقال لها ادعى لى، بس كده.. ألف رحمة ونور".
ورحل الفنان هشام سليم، عن عالمنا فى فى الساعات الأولى من صباح أمس الخميس، بعد صراع مع مرض السرطان، عن عمر ناهز الـ64 عاما، وشيعت أسرته ومحبيه وأصدقائه جثمانه بعد عصر أمس من مسجد الشرطة بالشيخ زايد، وتم دفنه بمقابر السرة على طريق الواحات.
