غادة عادل: وافقت على "البطة الصفرا" بعد رفضي تقديم أي أدوار كوميدية
كشفت الفنانة غادة عادل عن سبب موافقتها على المشاركة في فيلم "البطة الصفرا" بعد رفضها تقديم أي عمل كوميدي في الفترة الأخيرة.
قالت غادة عادل: "في البداية كنت مترددة، لكن رامي السكري ومحمد حفظي منتجي الفليم طلبا مني قراءته فقط، قولت لهم أنا مش عايزة أعمل كوميدي الفترة دي، فقالا لي طيب ممكن تقرأي بس علشان عايزين رأيك، ولما قرأت، من ربع الفيلم قولت لهما أنا شكلي هعمل الفيلم ده لأن الشخصية عجباني، والفيلم عاجبني"، حسب تصريحاتها لبرنامج "The Insider بالعربي".
وتابعت: ساعات بيبقى دور البنت في الأفلام الكوميدي مش حلو، ودي كانت أكتر حاجة بتضايقني شوية في الأفلام الكوميدي أن بيبقى دور البنت علشان لازم يبقى فيه واحدة تعمل أي حاجة مش مهمة، ولكن لما قرأت الفيلم ده هو فيه فيلم حلو وتقيل والكوميديا السوداء وفيه موضوع وفيه شخصيات حلوة.
وتحدثت غادة عادل عن تفاصيل دورها في فيلم البطة الصفرا، قائلة: "أقدم شخصية جديدة جدًا علي ومختلفة وخوفتني، والشخصية نفسها فيها حاجات كتير أنا معملتهاش في مشواري الفني قبل كده، وده حمسني إن فيلم كوميدي في دور البنت كبير ومهم".
فيلم "البطة الصفرا" من بطولة غادة عادل، ومحمد عبد الرحمن توتا، محمود حافظ وفرح الزاهد، وإبرام سمير وحسن أبو الروس وأحمد طلعت، والفيلم قصة وسيناريو وحوار محمود عزت ومن إنتاج المنتج رامي السكري، ويشارك في إنتاجه السيناريست والمنتج والرئيس السابق لمهرجان القاهرة السينمائي الدولي محمد حفظي بالإضافة إلى المنتجين كريم السكري وحامد مصطفى.
