نصائح ياسمين عز للزوجات خلال مشاهدة مباريات كرة القدم
قامت الإعلامية المصرية ياسمين عز، بتوجيه عددا من النصائح للزوجات بشأن التعامل مع أزواجهن خلال مباريات كرة القدم.
حيث قالت ياسمين عز، خلال برنامجها كلام الناس المُذاع عبر شاشة إم بي سي مصر: الناس مالهاش سيرة غير عن روعة ماتش إمبارح وجمال التنظيم في الرياض وكمان ملهمش سيرة غير ماتش القمة بين الزمالك والأهلي، والماتشات دي لها طقوس خاصة في البيت، لو اتصلتي بخطيبك أو بعتيله رسالة ومردش متزعليش لأنه بيكون في حياة غير الحياة ولو جوزك معرفش ينام أوعي تفتكري أنك بيفكر في واحدة تانية غيرك، لا دا بيفكر في نتيجة ماتش بكره.
وواصلت ياسمين عز: جوزك بيسأل نفسه كهربا هيلعب أساسي ولا احتياطي ومحمد شريف ناوي يرجع مخيف؟ وأنتي لا تعلمي شيء عن الصراع دا، إذا تكرمتي تفادي جوزك وبلاش تطلبي منه طلبات مالهاش لازمة هو عنده كام يوم في السنة بس وأنتي عندك طول السنة، مش لازم تطلعي المشاكل دلوقتي يا مدام جوزك مهموم، هو يا حبيبي عنده عرض طارئ اسمه القمة فوبيا وبيفكر لا قدر الله لو فريقه اتغلب هيهرب فين من تحفيل صحابه ولو فرقته اتغلبت متبقيش أنتي والزمن وصحابه اللي بيحفله عليه.
وأضافت ياسمين عز: متقربيش منه 3 أيام لحد ما الحكم يطلق صفارة نهاية المباراة وعدي على صوابعك 72 ساعة، أما لو جوزك كسب يا سعدك يا هناكي هيبقى عفريت صلاح الدين، وهتلاقي معاه فلوس فجأة من عند ربنا، ادعي فريقه يكسب عشان تعيشي أسبوع من السعادة الزوجية، ولو جوزك زملكاوي عمره ما هيخونك وعنده وفاء وإخلاص عمرك ما هتلاقيه، وأقل كلمة بتفرحه، ويعشق المتعة بصرف النظر عن النتيجة والشكل الحلو بيفرق معاه وبيحسس اللي حواليه أن قطته جمل وبيهتم بالتفاصيل.
وأكملت ياسمين عز حديثها، قائلة: الراجل الأهلاوي أصيل ومش بيقبل غير بالمركز الأول، وعنده قوانين صارمة وبيركز على هدفه، وبيحتفل بمناسبات غريبة بتخلد أمجاده زي أول مرة عملتيله بطة بالبرتقال وهيقولك البطة ممكن، ولو شلتيه في عينيكي هيطبق عليكي كل شعارات التالتة شمال وهيهتف بيكي وهيقولك من صغري أعشقك وعشانك يا غزال أهز جبال، والراجل سواء زملكاوي أو أهلاوي مفيهوش عيوب وكلهم طعمين وهايلين.
