أحمد عيد: بيتعرض علي أعمال كثيرة ولا أقدمها احتراما للجمهور

أكد الفنان أحمد عيد أنه لا يشعر بتجاهل الوسط الفني له، أو قلة الأعمال الفنية المعروضة عليه.

ونشر أحمد عيد عبر حسابه في موقع تويتر تغريدة قال فيها: "مساء الفل، لقيت تصريح متاخد من سياقه من كلام كان بيتقال بهزار، أنا حابب أوضح إني مقصدش أشتكي ولا أبان عندي مظلومية. أنا الحمد لله بيتعرض عليا شغل كتير وأنا اللي مش عايز أشتغل غير اللي شايفه كويس احتراما لنفسي وللجمهور.

وأكمل كلامه قائلا: "أنا مش فارق معايا أشتغل أصلا أو مشتغلش، المهم أعمل اللي أنا مقتنع بيه، أنا ماديا مش محتاج ولا عندي أي مشكلة الحمد لله، وكلامي بيتحور أحيانا عشان أبان بشتكي أو مظلوم ليه مش عارف"

وأضاف: "وبالنسبة للأخ اللي عمل تعليق على الصورة بيقولي مالك يا أستاذ أحمد عينك فيها حزن ليه وسايب دقنك وشنبك، عايز أقوله إن ده راكور عشان بصور حاليا، وبجد بشكركم كلكم على رسائل الدعم والمحبة".

وكان أحمد عيد قد حضر حفل توزيع جوائز Joy Awards بنسخته الثالثة في الرياض السبت الماضي.

وعبر أحمد عيد عن سعادته بحضور هذا الحدث وتواجده إلى جانب عدد كبير من النجوم العرب والأجانب، وقال في تصريحات تليفزيونية: "أنا مبقتش موجود على الساحة، واتفاجئت بدعوتي لـ حفل Joy Awards وفرحت إنهم افتكروني، ونفسي آجي تاني".

وتابع: "نهضة السعودية الفنية هتفيد الوطن العربي لأن كلنا واحد وبنتشارك في نفس اللغة والتراث، وأنا جيت السعودية وعملت مسرحية من 20 يوم ويمكن عشان كدا افتكروني".

يذكر أن أحمد عيد يتواجد في موسم رمضان 2023 من خلال دوره في مسلسل "عملة نادرة".

ومسلسل "عملة نادرة" تأليف مدحت العدل وإخراج ماندو العدل بطولة نيللى كريم، جمال سليمان، جومانا مراد، أحمد عيد، كمال أبورية، فريدة سيف النصر، ندا موسى، محمد لطفي، مريم الخشت، ومحمد فهيم، رمزي العدل ومن المقرر عرضه في رمضان 2023.