شيراز حسني تتهم موزع أغنيتها "أنا مش مامتك" بسرقته لأغنية حودة بندق

اتهمت المطربة المصرية شيراز حسنى موزع أغنيتها "أنا مش مامتك" الموزع مينو، التي طرحتها عام 2018، بسرقة نفس التوزيع لأغنية "عيشها بمزاج" للمطرب حودة بندق.

وعلق شيراز على صفحتها الفيس بوك قائلة: رغم اني اتعرضت لمواقف كتير وحشة منهم نصب وسرقة وعقود احتكار عطلتني كتير وقعدتنى في البيت، لكن دايما كنت بحل امورى بهدوء ولاني مابحبش وجع الراس كنت كتير بعدى وافوت، بس تقريبا في كتير افتكرو اني هبلة وبسكت عن حقي، فقالو يتمادو، المهم مع احترامي للفنان جاد شويري والفنان حودة بندق، والملحن مدين اللي ملحنلي الغنوة واللي رشح الموزع للغنوة، الا ان عيب علي موزع محترم اخد حقة المادى انه ياخد توزيع عامله وواخد تمنه لمطربين تانيين لاء ولانه عارف انه عامل حاجة غلط عمل ليا بلوك.

واضافت قائلة: اتفاجأت بناس بتكلمنى وتبعتلي رسايل تقولي الغنوة بتاعتك التوزيع مسروق ومعمول لغنوة تانية، دخلت اشوف لاقيت ان الموزع اللي وزعلي الغنوة، هو اللي وزع ولحن الغنوة التانية، بجد برافو علي الابداع، بس ياريت ماتتريقوش علي فنانيين المهرجانات وتتهموهم بالسرقة وتقللو منهم وكأنهم شيء حقير وانتو اصلا بتعملو اللي بيعملوه برافو عليكم، اللي هو انا اسرق عادى لكن اتسرق لاء اقلب الدنيا، وانا سيبلكم جزء من اللي اتاخد من الغنوة الحكم ليكم.