مدافعا عن الحجاب.. أمير طعيمة: اعتبروه زي الالحاد
دافع الشاعر الغنائي المصري أمير طعيمة عن حرية المرأة في ارتداء الحجاب، رافضًا أي محاولات لانتقاده أو التقليل منه.
ونشر أمير طعيمة عبر حسابه الرسمي على "فيسبوك": "هو موضوع فلانة لبست الحجاب و فلانة خلعته ده شاغل الناس ليه، إيه مشكلة البعض مع الحجاب أساسا".
أمير طعيمة ينتقد موقف العلمانيين من الحجاب
وأضاف: "بعض الإعلاميين ومن يطلق عليهم العلمانيين بيستقتلوا ليه عشان نفي فرضية الحجاب، يعني لو المحجبة اقتنعت بفتاويك وقلعت الحجاب الكون والكوكب والبلد هيستفيدوا إيه؟".
واستكمل "طعيمة": "هل إحنا مثلا دولة بنفرض لبس الحجاب على المرأة فإنت ضد قهرها؟ لا.. هل أحنا بنضيق على غير المحجبة مثلا في الوظائف والحياة العامة فإنت ضد ظلمها؟ لا، بل بالعكس دي المحجبة هي اللي فيه تضييق عليها في الفن والإعلام وبعض الوظائف، ده حتى فيه أماكن ومطاعم بتمنع دخول المحجبات".
واستطرد: "يبقى السؤال: الست المحجبة دي مضايقاك في إيه وقارفها في عيشتها بكلامك ليه، و عمال تجيبلي صور قديمة و تقارنها بصور جديدة كما لو كان ده دليل اننا كنا متحضرين و بقينا متخلفين، معلش هو مال التحضر بالحجاب و الفستان المفتوح و الميكرو جيب مش فاهم، يعني المحجبة لو لبست اللي بيبسطك معدل ذكائها و انتاجيتها هيرتفعوا فالبلد هتروح في حتة تانية؟".
كما كتب أمير طعيمة في منشوره: "وبعدين تعالى نفترض أننا صحينا من النوم لقينا البلد كلها مفهاش محجبة واحدة زي ما بتتمنوا.. ها؟ طلعنا القمر كده؟ بقينا في مقدمة الدول تعليميا؟ معدل النمو هيزيد؟ هنغزو العالم والجنيه هيبقى بألف دولار؟".
واختتم "طعيمة" منشوره بقوله: "و يا عم يا اللي شايف الإلحاد ظاهرة صحية ودعوة للتفكير والشذوذ حرية شخصية، ممكن تتواضع وتعامل المحجبة نفس المعاملة وتعتبرها حرة في اختيار لبسها وتكبر دماغك وتشوف وراك إيه وتعمله، و لا أنت اللي معطلك ومخليك خيبان كده إن فيه ستات محجبات حاجبين عنك أحلامك وأهدافك العظيمة".
