بسبب تصريحاته عن وفاة ابنه.. حازم إيهاب يتصدر ترند جوجل

تصدر الفنان حازم إيهاب، ترند موقع جوجل، وذلك بعد حديثه عن أزمة وفاة طفله الرضيع "يونس"، الذى توفى مارس الماضى، خلال لقاء له مع الإعلامية عبير بسيوني في برنامج رمادي.

وأوضح حازم إيهاب، أنه عاش أزمة كبيرة بعد ولادة طفله "يونس" امتدت لأسبوعين، بسبب وجود عيب خلقى بالقلب.

وكشف حازم إيهاب: "ابنى كان مكتوب له إنه ييجى الدنيا ويقعد معانا 13 يوم ويروح للى خلقه تانى يعنى ابن اللذينا ضمن الجنة من غير أى حاجة".

وأعلن حازم إيهاب، بأنه حصل على فتوى من الأزهر بجواز إجهاض ابنه: "الأزهر أفتى لى إن إحنا ننزله بس مكانش عندى المنطلق ده".

ورفض إيهاب، إجهاض ابنه، رغم الإجازة، موضحا: "تفكيرى كان بيقول اللى ربنا كاتبه له هيشوفه بس مش هعرف أسامح نفسى لو كنت وافقت على إجهاضه كنت ممكن أطارد نفسى وألومها بعدها بكام شهر مش جايز كان ربنا حط فيه معجزة".

وعن كواليس صلاة الجنازة على نجله، قال حازم إيهاب: "واحنا رايحين نصلى عليه فإمام المسجد قال إحنا بنصلى على المتوفى عشان ربنا يخفف عنه ويرحمه ده نصلى عليه ليه؟ إحنا بنحاول نتمحك فيه عشان يدخلنا الجنة معاه".

وتابع: "من سذاجتى عشان أول مرة أكون فى موقف زى ده روحت مكلم حد حجزلى قاعة عزاء وبعدين اكتشفت أن الأطفال مبيكونش ليهم عزاء أصلا".

وعن تفاصيل أزمة ولادة "يونس" ابن حازم إيهاب، قال: "فى الشهر الخامس عرفنا إن يونس هيبقى عنده عيب خلقى فى القلب، ولما اتولد زوجتى مكانتش عارفة إنه دخل العمليات، ودى كانت مشكلة أكبر بكتير، نقلناه المستشفى، وفضلنا نقول لمنة إنه تحت فى الحضانة، كام يوم وابتديت أسرسب لها المعلومات واحدة واحدة".

وفي مارس الماضى، أعلن إيهاب وفاة ابنه "يونس" بعد 13 يوما من ولادته، وبعد خضوعه لعملية جراحية دقيقة بالقلب، وشارك وقتها جمهوره ومتابعيه عبر حسابه بموقع "إنستجرام" تفاصيل الأزمة.