الفنانة شهيرة: محمود ياسين أعطاني القوة والسند وكنا متفاهمين
قالت الفنانة شهيرة جمعني أنا وزوجي محمود ياسين فيلم وأنا في سنة أولي معهد، ولما قلبنا دق وحسينا بمشاعر الحب، وصرح لي وإحنا في سنة تانية، اتجوزنا، ووقت زواجي من محمود ياسين كنت لسه بستكشف الطريق الفني، وكان هو ساعتها عامل مسرحية "ليلة مصرع چيفارا" في المسرح القومي، وكان تعاقد على فيلم "نحن لا نزرع الشوك"، وكان مستعجل علي إتمام الزواج.، جاء ذلك خلال مداخلة هاتفية لبرنامج "كلمني زي ما بكلمك" تقديم خلود نادر علي نغم إف إم.
و أضافت ابتديت بدري إني أخد بطولة فنية وأنا في سنة أولي في المعهد، ولما طلب الزواج مني، كنت في حيرة إني لازلت تلميذة وفنانة وهكون زوجة لمحمود ياسين و غالبا اللي بيشتغلوا في نفس المجال بيكونوا ثنائي ناجح، لأنهم متفهمين الأوضاع، وتفاصيل الشغل نفسه، لأنهم من نفس المجال وبينهم دعم.
أما في بداية زواجي اندمجت في الحياة الأسرية، وكنت بروح المعهد وأنا حامل، ولم أعد للأعمال الفنية إلا بعد 6 سنوات نتيجة إني كنت أم، وطلب مني محمود إني أخلص البكالوريوس قبل أي عمل فني.
واختتمت قائلا مرة أحضرت له كوب ماء ووجدته يقول لي أنتي ست عظيمة، مش بس فرحت عشان الكلمة، أنا فرحت عشان هو كان حاسس إني جنبه وسنده وفي ضهره، و ربنا سخرني ليه عشان هو إنسان جميل وإنسان عظيم بكل ما تحمله الكلمة من معني، وإداني القوة والسند.
