عزيز الشافعي: أنا مع الناس ورأيي من رأيهم وشخصيتي اللي بتقودني في شغلي
قال الملحن والموزع عزيز الشافعي أنا ما عنديش توليفة أو طقوس معينة في تلحين أو توزيع شغلي، لكن شخصيتي هي اللي بتقودني في عملي الموسيقي خصوصا إني بحب الموسيقى الكلاسيك جدا سواء شرقي أو غربي، و مشروعي الفني كله قائم على حبي لرواد الموسيقى الشرقية مثل سيد درويش وعبد الوهاب والموجي وبليغ حمدي، هما اللي بحس إنهم بيمثلوني وقريبين جدا من شخصيتي الفنية، بالإضافة للجانب التجاري اللي تعلمته في عملي بالأفراح كمطرب كنت بغني وأنا بدرس، فكل ده عمل مزيج كون شخصيتي الموسيقية، جاء ذلك خلال مداخلة هاتفية لبرنامج خلاص صحينا تقديم مارينا المصري على ميجا إف إم.
و أضاف سعيد بنجاحات أعمالي الأخيرة والصدى الذي تحقق مع كل المطربين اللي اشتغلت معاهم، زي عسيلي مثلا في أغنية "دوم دوم" باعتبارها أغنية مختلفة على شغلي وعلى شغل عسيلي وده كان أول تعاون بينا، و"تعالى أدلعك" مع بهاء سلطان اللي رجع بيها بعد غياب للساحة الغنائية، وبعدها "دلوقتي عجبناكم"، و"أدرينالين" مع حماقي، والحمد لله سنة 2022 كانت كلها حلوة عليا.
وتابع عملت أغنية جديدة ليا بصوتي وألحاني وهتتعمل كليب، اسمها "ولاد ناس"، ودي مش أول مرة أغني فيها، بس المرة دي الموضوع معمول بشكل احترافي في كل حاجة، ومقدم شكل موسيقى مختلف عني، والأغنية كلحن وكلمات عبارة عن رسالة عايزة أبعتها لكل الوسط الغنائي، عشان ليا آراء ووجهات نظر مش عايز أقولها بشكل مباشر، وهتوصل من خلال الأغنية.
واستطرد قائلا: الملحن من حقه يقول رأيه في أي حاجة، بس من غير تجريح لأن الملحن أو المطرب مش بيمثل رأيه لوحده، باعتباره شخصية عامة، فهو بيمثل رأي زملائه وبلده، وبتضايق لما شخصية عامة تقول كلام صادم يبقى تريند.
واختتم قائلا أنا مع التنوع والتجديد والاختلاف، بس بحرية مقيدة مش مطلقة ولازم تلتزم بقيود الدين والعادات والقيم، لكن في الموسيقى والغناء كل واحد من حقه يتجنن ويغير، وفيه ناس اعترضت على كليب أغنية محمد أسامة الجديد "كام ملاحظة"، وقالت إزاي طفل صغير يغني الكلام ده لمدرس، ورغم إني ملحن الأغنية لكن أنا مع الناس دي ورأيي من رأيهم، لأن الفيديو اتقدمت بشكل يتفهم غلط عكس طبيعة الأغنية، وتم تغيير مونتاج الكليب حتى لا يُفهم منه إنه طفل بيتحرش بمدرسته.
