عمرو اديب احذروا فتنة الساحل الشمالى
قال الإعلامي عمرو أديب: "بطل الصيف السنة دي الساحل ولاحظت إنه يتم استخدامه طبقيًّا، يعني حرب الطبقات وتسخين الطبقات على بعض يتم استخدامها في وقت الأزمات الاقتصادية عايز تجنن الناس وتنكد عليهم تقول لهم إلحق الناس بتصرف كام في الساحل وبتعمل إيه في الساحل، وهذه نظرة متأمل للأمور فقط".
وعلق الإعلامي عمرو أديب على الصور المتداولة لعدد من المواطنين أثناء شراء فلل وشاليهات في الساحل بمبالغ تفوق الـ 120 مليون جنيه، قائلًا: "فيه تسخين بين الناس اللي ساكنة في الساحل والناس اللي مش موجودة في الساحل، وتصعيد طبقي داخل الساحل نفسه بتقسيمه إلى قسمين الساحل الطيب والساحل الشرير، ولو عايز تنظر بعمق وبصراحة، الناس توقفت عند إنه فيه مشروع نازل لفيلات وتباع به الفيلا بـ 120 مليون جنيه، والناس سألت إزاي السعر ده؟".
وتابع خلال تقديمه برنامج “الحكاية” المذاع على فضائية إم بي سي مصر: "أنا عايز حضراتكم وليس دفاعًا الناس حرة اللي عايز يشتري يشتري ولكن عايز أقول لكم الناس دي اشتريت ليه، فهذا الأمر مشروع جديد لإعمار ولديها أسعار مثل هذه الأسعار بنفس الأسعار وهذه الأسعار ليست جديدة".
واستكمل: "وعايز أقول لكم إنه اللي اشترى ده عنده أكثر من فيلا في الساحل وهو اشترى وعارف إنه هناك 3 أو 4 أسماء في الساحل اللي بتشتري بها هذا العام بتزيد العام التالي، والتسليم بعد أربع سنوات وعلى ما المجتمع ده يزدهر ويكون صالح للسكن قدامه ست سنوات فاللي مش شاري مش شاري عشان يسكن دلوقتِ إطلاقا، وكثير ممن اشتروا في هذا المشروع وغيره هم من دول عربية شقيقة وهذا أمر أنا سعيد به جدًّا، فالعالم العربي عرف الساحل، ونحن نرحب بإخوانا في الدول العربية ".
